Forskningsfelt for marknadshagedyrking
I prosjektet «AgroSmågrønt» har det i år blitt etablert eit pilotfelt etter marknadshageprinsipp ved NIBIO Landvik, utanfor Grimstad. Målet er at feltet kan bli eit langvarig forsøksfelt for marknadsahagedrift i Noreg.
Feltforsøk i 2025
Årets feltforsøk tar fatt på effekten av ulikt gangdekke på ugraspress og ein eventuell gjødslingseffekt av ulikt gangdekke. Registreringar av ugras blir gjort annankvar veke, jordprøvar vert tekne ved start og slutten av sesongen. For samanlikninga sin del er det også etablert eit felt etter «storskala prinsipp» ved sidan av, for å demonstrere visuelle skilnadar mellom modellane.
Utvikle ein metode
Etter ein runde med intervju blant eit utval erfarne småskala grønsaksprodusentar, har det blitt kartlagt ein del utfordringar som er gjeldande særskilt for marknadshagemodellen. Målet med dette fyrste pilotprosjektet, er å få systematisert utfordringane og utarbeidd ein god metode for å sjå nærmare på ulike løysingar i feltforsøk.
Problemløysing for dyrkarar
Mange av utfordringane som kom opp i intervjua er «fleirårige» problemstillingar, der eit feltforsøk må gå over fleire år for å kunne gi relevante resultat. Døme på dette kan vere sjukdomspress i dyrking på faste bed, med avgrensa areal for optimalt vekstskifte.
For å få til fleirårige feltforsøk, krevst det ei større prosjektramme. Forskarane ved NIBIO vonar dette fyrste prosjektet (kun eitt år) kan vere eit startskot for meir omfattande forsking på dyrking etter marknadshageprinsipp, og som skal kunne hjelpe til med å løyse agronomiske utfordringar småskala grønnsaksprodusentar møter i kvardagen.
